Need To Explain? Political Dynasties

Kalakaran ang mga magkakaanak sa pulitika sa  Pilipinas. Hindi ito bagong problema, pero sa takbo ng panahon, mas lumalim ang kapit ng iilangangkan sa bansa natin.

Noon, mayroong dalawang antas pa lang ng political dynasty: 1) Thin, ang isa-isa o nagsasalitan na mga magkaanak sa piling posisyon sa gobyerno, at; 2) Fat  kung saan iilang miyembro ng pamilya ay nasa iba’t ibang posisyon sa gobyerno. Ayon kina Mendoza, Jaminola, at Yap sa kanilang papel, halimbawa ang Pilipinas ngayon sa mas malalang antas ng political dynasty, ang obese: Higit sa limang miyembro ng pamilya ay sabay-sabay na nakaupo sa gobyerno. Karaniwan sa atin na nasa lokal (probinsya, munisipyo, barangay) ang base ng kapangyarihan ng mga pamilya, at habang tumatagal magkakaroon sila ng mas malaking pagkakataon na makapasok din sila sa mga posisyong pambansa o national.

Paano nakakahamak sa demokrasya ang mga political dynasty?

Naiipon sa apelyido nila ang kapangyarihan at kasangkapan upang maging padron: May kapangyarihan sila mamili kung kanino mapupunta ang mga pampublikong serbisyo, na magdesisyon kung saan ilalaan ang pondo mula sa buwis ng manggagawa’t mamamayan, kung ilalaan ito sa ayuda  o sa iba’t-ibang personal na programa.

Sa isang lipunang laganap ang kahirapan at kawalang katiyakan, ang “politikang ayuda” ng mga angkan at trapo ang isa sa kanilang mga instrumento upang manatili sa kapangyarihan. Mauulit-ulit ang kanilang pagiging padron lalo na’t namimigay sila ng pansamantalang tulong o ayuda na may tatak ng angkan nila, kahit galing ito sa kaltas sa sahod natin o sa patong na buwis sa mga bilihin.

Imbis na serbisyo ng gobyerno, pinaparating nila na ito ay mula sa kanilang kabaitan. Halos sinasabi na kung mawala sila sa posisyon, mawawala na rin ang ayuda na sa totoo ay kaltas sa ating buwis. Sa ganitong paraan nawawasak ng politikang ayuda na sanhi ng political dynasties ang demokrasya. Ang pagboto at pagserbisyo ay nauuwi sa sino ang kaya magbigay, hindi kung ano ang laman ng programa ng mga kumakandidato.

Protesta ng SENTRO laban sa Zero Subsidy sa PhilHealth sa ilalim ng 2025 Budget.

Ano pwede natin gawin?

Sa darating na eleksyon, tayo’y bumoto base sa agenda ng manggagawa at ituloy natin ang pagbuo ng ating labor vote. Gamitin natin ang ating lakas bilang kilusan sa pagpapasok ng mga kampeon ng mga karapatan ng manggagawa sa gobyerno. Tayo’y nanaliksik at bumubuo ng mga mungkahing legislasyon para solusyunan ang mababang sahod, ang mataas na inflation, ang kawalan ng seguridad sa trabaho. Siguraduhin nating may makikinig sa boses natin bilang manggagawa, na may mananagot sa ating mga hinaing. Ipanalo natin ang mga kandidatong tutulong ipanalo rin ang ating agenda.

Gayundin, di mawawala ang mga problema natin sa isang eleksyon, o sa paghahanda para sa susunod. Ipatuloy ang gawain sa kilusang paggawa sapagkat nabubuhay ang demokrasya sa aktibong partisipasyon ng mga mamamayan. Ito ay pawang karapatan at tungkulin ng bawat Pilipino. Hindi natatapos ang ambag natin sa bansa sa eleksyon. Alalahanin natin na tayong mga manggagawa at mamamayan ang nagpopondo sa gobyerno, at kailangan nating siguraduhing nagagamit sa tamang paraan ang bunga ng ating marangal na paggawa.

Sanggunian:

Mendoza, Ronald U. and Jaminola, Leonardo and Yap, Jurel, From Fat to Obese: Political Dynasties after the 2019 Midterm Elections (September 1, 2019). ATENEO SCHOOL OF GOVERNMENT WORKING PAPER SERIES, September 2019, 19-013, Available at SSRN: https://ssrn.com/abstract=3449201 or http://dx.doi.org/10.2139/ssrn.3449201

Mga artikulo sa litrato: